Сайаапкалары хомуйуу кулун тутар 5 күнүттэн ыытыллыаҕа. 100 бастыҥтан бастыҥ педагог сүүстүү тыһыынча бириэмийэ тутуохтара. Санатан эттэххэ, ааспыт сыл ахсынньы ыйыгар хампаанньа Саха Өрөспүүбүлүкэтин Үүнэр көлүөнэ тус сыаллаах пуондатын кытары бииргэ үлэлииргэ дуогабардаспыттара, итиэннэ Саха АССР төрүттэммитэ 100 сыллаах үбүлүөйүн көрсө ыытыллар тэрээһиҥҥэ харчынан көмөлөһөргө сөбүлэҥ түһэрсибиттэрэ.
Куонкуруска биэс сылтан кырата суох ыстаастаах орто уонна эбии үөрэхтээһин программаларынан үлэлиир учууталлар, уһуйааччылар кыттыахтарын сөп.
«Өрөспүүбүлүкэҕэ педагогтары бэлэмнээһиҥҥэ өрүүтүн улахан болҕомто ууруллар. Квалификацияны үрдэтиигэ, маны сэргэ, саҥа көҕүлээһиннэр, саҥа саҕалааһыннар мэлдьи сыанабылга сылдьаллар, ону сайыннарыыга усулуобуйа тэриллэр. Бэлиэтиэм этэ, бизнес социальнай эппиэтинэһэ региоҥҥа каадырдары бэлэмнээһиҥҥэ, сайыннарарга улахан көмөнү оҥорор», – диэн Саха Өрөспүүбүлүкэтин Ил Дархана Айсен Николаев эттэ.
100 тыһыынчалаах бириэмийэни Өрөспүүбүлүкэ үөрэҕин сайдыытыгар суолталаах кылааттарын укпут педагогтар ылыахтара. Тустаах хамыыһыйа үөрэнээччилэр таһымнарын, үөрэх программатын ылыныыларын, уруокка аныгы технологиялары, дистанционнай форматы төһө сөпкө туһаналларын, итиэннэ үөрэнээччилэр араас күрэхтэргэ ситиһиилэрин сыаналыахтара.
«Куонкурус учууталларга тэҥ кыаҕы биэрэр. «РНГ» АУо-ҕа биһиги педагогтарбытын өйүүллэрин, уонна бииргэ үлэлииргэ баҕаларын биллэрбиттэригэр махтанабыт», – диэн «СӨ Үүнэр көлүөнэ тус сыаллаах пуондата» коммерческайа суох тэрилтэ генеральнай дириэктэрэ Владимир Егоров эттэ.
«РНГ» АУо үөрэхтээһин салаатын бырайыактарын өрүүтүн өйүүр. Өрөспүүбүлүкэ үөрэҕин кыһаларыгар консультационнай көмөнү таһынан, материальнай-техническэй бааза тупсуутугар болҕомтотун уурар.
««РНГ» АУо сайдыытын кэскиллээх былаана уустук уонна боростуойа суох кыһалҕалаах боппуруостары быһаарар сыаллаах. Хас биирдии ситиһии төрдө — киһи. Ол да иһин, биһиги, оскуолалары, үрдүк үөрэх кыһаларын кытта бииргэ үлэлээн үөрэх бырайыактарын өйүүбүт, эдэр исписэлиистэри бэлэмнииргэ көмө буолабыт, каадыр боппуруоһугар күүскэ ылсан үлэлиибит. Дьоҥҥо инвестиция саамай көдьүүстээх инвестиция буоларын биһиги бигэргэтэр кыахтаахпыт», – диэн бэйэтин санаатын «РНГ» АУо генеральнай дириэктэрэ Владимир Ракитин үллэһиннэ.
Куонкурус түмүктэнэр болдьоҕо — муус устар ый.