Саха Өрөспүүбүлүкэтин Үүнэр көлүөнэ тус сыаллаах пуондатын кытта бииргэ үлэлэһии докумуонугар олоҕуран хампаанньа «Красный всадник» национальнай балет туруоруутугар анаан 3,5 мөлүйүөнтэн тахса суумма харчыны тыырда. Көрөөччүлэр испиктээкили Д.К. Сивцев-Суорун Омоллоон аатынан Судаарыстыбаннай опера уонна балет тыйаатырын сыанатыгар номнуо 2027 сыл сааһыгар көрүөхтэрэ.
Арассыыйа уонна Саха Өрөспүүбүлүкэтин үтүөлээх артыыһа, тыйаатыр кылаабынай балетмейстера Екатерина Тайшина туруоруутугар «Красный всадник» айымньы Саха Өрөспүүбүлүкэтин гиэрбэтигэр баар кыһыл аттаах киһи уобараһыгар олоҕурбут. Бу уобарас Шишкинскай суруктар петроглифтарыгар майгыннатан үөскээбит. Испиктээкил түҥ былыргы бэлиэ төрүттэммит остуоруйатын арыйыаҕа.
Туруорууга Николай Рерих 1920 сыллардаахха суруйбут «Майтрейя (эбэтэр Красный всадник)» хартыыналарын матыыптара туһаныллыахтара. Испиктээкил муусукатын композитор, «Ньургун Боотур» уонна «Алиса в стране чудес» туруорууларынан биллэр, Руслан Мурсякаев суруйбут. Либреттоны – балет литературнай сценарийын, тыйаатыр дириэктэрэ Владислав Левочкин.
Саҥа туруоруу сүрэхтэниитэ 2027 сыл муус устар ыйыгар былааннанар. Итиэннэ Саха сирин историятыгар бэлиэтэнэр, уһулуччу суолталаах үс улахан тэрээһини кытта быһаччы сибээстээх: Саха сирэ Арассыыйа састаабыгар киирбитэ 395, Өрөспүүбүлүкэ төрүттэммитэ 105 сылларыгар уонна кыһыл аттаах киһилээх аныгы гиэрбэ бигэргэммитэ 35 сылларыгар ананар.
«РНГ» АУо региоҥҥа ыытыллар култуурунай көҕүлээһиннэри мэлдьи өйүүр. «Красный всадник» национальнай балет Саха Өрөспүүбүлүкэтин култуурунай олоҕор улахан суолталаах буолуоҕа.
