«РНГ» АУо Россиятааҕы театральнай искусство институтун уонна Саха Өрөспүүбүлүкэтин культураҕа уонна духуобунай сайдыыга министиэристибэтин кытта холбоһуктаах үөрэх бырайыактарыгар финансовай өйөбүлү оҥордо.
Бастакы программа - «Совершенствование профессиональных навыков актера. Управление эмоциями» – Былатыан Ойуунускай аатынан Саха тыйаатырын аччыгый саалатыгар бу күннэргэ ыытыллар. Бу тэрээһиҥҥэ 67 киһи кыттыыны ылар, улахан аҥардара Өрөспүүбүлүкэтээҕи тыйаатырдар, культура уонна искусство арктикатааҕы институтун улахан кууруһун устудьуоннара буолаллар. 3 күн устата ГИТИС уһуйааччылара, артыыс маастарыстыбатын кафедратын үлэһиттэрэ, Татьяна Морозова уонна Сергей Посельскай лекциялары ааҕыахтара итиэннэ практическай занятиелары ыытыахтара.
«Бастыҥ үрдүк үөрэх кыһатын кытары холбоһуктаах бырайыактар Саха Сиригэр айар талааны сайыннарыыга төһүү күүс буолуохтара, итиэннэ өрөспүүбүлүкэҕэ театральнай искусство өссө күүскэ өрө тахсарыгар кыах бириэхтэрэ. Биһиги айар талааннаах эдэр ыччаппытын, артыыстарбытын, режиссердарбытын, уопсайынан айар талааннаах дьоммутун, араас хайысханан сайдалларын өйүү сатыыбыт. Бу боппуруоска Ил Дархаммыт Айсен Николаев эмиэ улахан болҕомтотун ууран туран үлэлиир. «РНГ» АУо-ҕа уонна ГИТИС салалтатыгар муҥура суох махталбытын тиэрдэбит», – диэн регион культураҕа уонна духуобунай сайдыыга миниистирэ Юрий Куприянов бэлиэтээн эттэ.
Иккис программа – «Менеджмент в сфере культуры» – Дьокуускай куоракка сэтинньи 21 күнүттэн 25 күнүгэр диэри ыытыллыа5а. Манна Саха сирин культура тэрилтэлэрин үлэһиттэрэ, исписэлиистэрэ кыттыыны ылыахтара.
«Өрөспүүбүлүкэ территориятыгар культурнай бырайыактары өйөөммүт федеральнай үөрэх кыһаларын, ааттаах-суоллаах коллективтары сыһыара сатыыбыт. Маныаха ГИТИС уһуйааччыларын куурустара төһүү күүс буолаллар уонна регион тас өттүгэр бара-кэлэ сатаабакка саҥа билиини ыларга, уопут атастаһарга көмөлөһөллөр», – диэн «РНГ» АУо генеральнай дириэктэрэ Владимир Ракитин тоһоҕолоон эттэ.