Саха Сирин Ленскэй оройуонун территориятыгар Мурбайдааҕы лицензионнай учаастак сиригэр кэскиллээх саҥа баайдаах сир арылынна.
Экспертэр бэлиэтииллэринэн бу учаастак элбэх саппаастаах буолуон сөп итиэннэ эбийиэги «Сибиир күүһэ» магистральнай газ турбатын ресурснай базатыгар холбуур кыах баар буолуон сөп. Бастакы ааҕыынан газ хостонор саппааһа саҥа сиргэ 27 млрд м3 тэннэһэр.
Генеральнай дириэктэри солбуйааччы, «РНГ» хампаанньа кылаабынай геолога Сергей Назаров: “Үөһээ этиллибит сыыппара барыллаан этии буолар. Өссө чинчийиллэ илик 3 скважина баар, ол үлэтэ ыытылыннаҕына кырдьыктаах сыыппара тахсыаҕа. Оччотугар эрэ саппааһы былаанныыр, ааҕар кыахтаныахпыт”- диэтэ.
«РНГ» хампанньа көҕүлээһининэн саҥа сиргэ «РНГ» хампаанньа урукку генеральнай дириэктэрин Иван Меньшиков аата иҥэрилиннэ.
Иван Меньшиков дойдуга топливно-энергетическэй комплекс сайдыытыгар улахан оруоллаах киһинэн биллэр. Бочуоттаах нефтяник, Саха Республикатын норуотун хаһаайыстыбатын үтүөлээх үлэһитэ. Кини ыйыытынан — кэрдиитинэн, салалтатынан Орто Ботуобуйа Киин уонна Илин блоктарынан, Курунгскай учаастагынан сир баайын хостооһун үлэлэрэ саҕаламмыттара.
«АссоНефть» ниэп, газ хостуур тутулуга суох тэрилтэлэр ассоциацияларын генеральнай дириэктэрэ Елена Корзун бу курдук эттэ: “Нефтяниктарга үтүө үгэс буолбут тэрээһин баар. Сир баайдаах сир саҥа арылларыгар саҕалааччы, тэрийээччи киһи аатын иҥэрии. Кырдьык, Иван Михайлович, бу сирдэргэ үлэ барарыгар туһаайан элбэҕи оҥорбут киһи буолар. Бастыҥ быһаарыныы иһин сүһүөхтээх бэйэм сүгүрүйэбин” – диэтэ.
Саҥа арыллыбыт сир хампаанньа инники сайдыытыгар сүҥкэн хардыыны оҥорор кыахтаах. Бүгүн үлэлиир аныгы үйэ технологията барыта туһанылыннаҕына сайдар кыах толору баар.
Саха Республикатын Ил Дархана Айсен Николаев, «РНГ» хампаанньа республика социальнай –экономическэй сайдыытыгар улахан өҥөтүн бэлиэтээтэ: “Бастаан утаа бэрт кыра “РНГ” геологоразведочнай хампаанньа, билигин ниэп,газ хостооһунун сүрүннүүр баараҕай тэрилтэҕэ кубулуйда. Бигэтик этиэхпин сөп – бу барыта сөптөөх салайыыны, олохтоох дьон иннигэр социальнай эппиэтинэһи кытта быһаччы сибээстээх. Саҥа сир арыллыыта, чуолаан Ленскэй оройуонун оло5ор улахан суолталаах. Оройуон саҥа үлэ миэстэлэринэн хааччыллар кыахтаах”.
Сонуну таһаарда: sakha.gov.ru
