Саха сиринээҕи үүнэр көлүөнэ тус суаллаах пуондатын кытары бииргэ үлэлэһии докумуонугар олоҕуран, хампаанньа, үөрэхтээһин хайысхатын бастыҥнарыгар бириэмийэ олохтуурга анаан үбүлээһини оҥордо. Ол курдук, сыл бүтэһигэр диэри 100 бастыҥ учуутал 100 тыһыынча харчынан бириэмийэлэниэҕэ.
Куонкуруска кыттыыны сүрүн уонна эбии үөрэхтээһиҥҥэ үлэлиир программалары олоххо киллэрэр, ол иһигэр үөрэх кыһатын көрүҥүттэн тутулуга суох наставничество программалара киирэллэр, үс сылтан кырата суох ыстаастаах учууталлар ылыахтарын сөп.
100 тыһыынчалаах бириэмийэни Өрөспүүбүлүкэҕэ үөрэхтээһин сайдыытыгар дьиҥ-чахчы бэйэлэрин кылааттарын киллэрбит учууталлар тутуохтара. Тутулуга суох хамыыһыйа сыанабылыгар киириэхтэрэ: үөрэнээччилэр ситиһиилэрэ, араас үөрэхтээһин ньымаларын көдьүүстээхтик туһаныы сатабыла, үөрэнээччилэр куонкурустарга уонна олимпиадаларга кыайыылара, маны таһынан, куонкуруска кыттар учуутал бэйэтэ тус ситиһиилэрдээх буолуохтаах.
Үөрэхтээһин хайысхатын бастыҥнарын быһаарар куонкурус аан бастакытын 2022 сыллаахха ыытыллыбыта, тэрээһин Саха АССР төрүттэммитэ 100 сыллаах үбүлүөйүгэр анаммыта. Бу бастакы күрэх түмүгүнэн бастыҥ учууталлары быһаарыы куонкуруһа сыл ахсын тэриллэригэр быһаарыныы ылыммыттара.