«РНГ» АУо тэрээһин көҕүлээччитэ уонна Генеральнай партнера. Саха Өрөспүүбүлүкэтин Үүнэр көлүөнэ тус сыаллаах пуондатын кытары бииргэ үлэлэһиитин иитинэн хампаанньа сыл ахсын бастыҥ педагогтарга бириэмийэ олохтуур. 2025 сыллаахха куонкуруска 458 сайаапка киирбит, бу көрдөрүү иннинээҕи сылтан 17 % үрдүк. Сыл ахсын Өрөспүүбүлүкэ педагогтарын икки ардыгар куонкурус элбэх биһирэбили ылар.
Куонкуруска 3 сылтан кырата суох ыстаастаах, орто, анал уонна оскуола иннинээҕи саастаах оҕолору кытта үлэлэһэр педагогтар кытталлар, бу испиэһэккэ өссө эбии үөрэхтээһин эмиэ киирсэр. Тутулуга суох куонкурус хамыыһыйата кыттааччылары бу түһүмэхтэринэн сыаналаата: үөрэнээччилэр уонна иитиллээччилэр ситиһиилэрэ, олимпиадаларга, араас социальнай проектарга миэстэлэһиилэрэ, педагог бэйэтин үлэтэ, идэтин таһыма. Куонкурус түмүгүнэн Саха сирин 100 бастыҥ педагога 100-түү тыһыынча бириэмийэ ылаллар. Тэрээһин түмүктүүр үөрүүлээх чааһа муус устар 25 күнүгэр Дьокуускайга Бырабыыталастыба дьиэтигэр ыытыллыаҕа.
««РНГ» АУо өйөбүлүнэн 100 тыһыынчалаах бириэмийэни олохтооһун – бу Өрөспүүбүлүкэ эрэ буолбакка бүттүүн дойду сайдыытын түстүүр дьоммут үлэтин үрдүктүк сыаналааһын буолар. Педагогтар үүнэр көлүөнэ ыччаты сөптөөхтүк иитиигэ, үөрэтиигэ сүҥкэн оруолу ылаллар. Бу бириэмийэ кинилэр киллэрбит кылааттарын сыаналааһыҥҥа эрэ буолбакка, кинилэри саҥа хардыыларга, ситиһиилэргэ кынаттыыр. Биһиги «РНГ» АУо-ҕа үөрэхтээһин эйгэтигэр оҥорор кылаатын үрдүктүк сыаналыыбыт, бииргэ үлэлэһэн сайдыы, тирэх, хаачыстыба туһугар өссө туруулаһарга бигэ эрэллээхпит», – диэн Саха Өрөспүүбүлүкэтин үөрэххэ уонна наукаҕа миниистирэ Нюргуна Соколова бэлиэтээн эттэ.