Хампаанньа – тэрээһин көҕүлээччитэ уонна Генеральнай партнера. Саха Өрөспүүбүлүкэтин кэлэр көлүөнэ тус сыаллаах пуондатын кытары бииргэ үлэлэһии түмүгэр сыл хасын бастыҥ учууталларга анаан бэйэтин үбүттэн бириэмийэ олохтуур.
Куонкуруска кыттыыны үс сылтан кырата суох ыстаастаах, оскуола иннинээҕи, алын кылаас, сүрүн үөрэхтээһин уонна уопсай анал үөрэхтээһин эйгэтигэр үлэлиир педагогтар кыттыныы ылаллар.
Быйылгы сылга сайаапкаларын 390 педагог Өрөспүүбүлүкэ 36 муниципальнай тэриллиититтэн ыыттылар.
Бастыҥ учууталы, уһуйааччыны талар күрэххэ ирдэбиллэри Саха Өрөспүүбүлүкэтин үөрэххэ министиэристибэтэ таҥан оҥордо. Манна улахан болҕомто үөрэнээччилэр үрдүк ситиһиилэригэр, куонкуруска кыттааччы тус ситиһиитигэр уонна педагог аныгы олох ирдэбилигэр сөп түбэһэн үөрэххэ туттар ньымалара сыаналаналлар. Маны сэргэ, хас биирдии категорияҕа эбии ирдэбиллэр киирбиттэрэ, онтон сиэттэрэн күрэҕи сыаналааһын ордук кырдьыктаах.
Куонкурус түмүгүнэн Саха сирин 100 бастыҥ учуутала талыллыаҕа, кинилэр бары 100 тыһыынча бириэмийэ тутуохтара. Наҕараадалааһын Россия күнүн көрсө бэс ыйыгар туттарыллыаҕа.
Үөрэхтээһин эйгэтигэр бастыҥ учууталлары талыы аан бастакытын 2022 сыллаахха ыытыллыбыта уонна Саха АССР төрүттэммитэ 100 сылыгар анаммыта. Бу кэмтэн саҕалаан куонкуруһу сылын ахсын ыытар туһунан быһаарыныы ылыммытттара.
««РНГ» АУо көҕүлээһинэ учуутал идэтин таһымын үрдэтиигэ уонна кини үлэтэ Өрөспүүбүлүкэҕэ үөрэхтээһин сайдыытыгар дьоһун кылаат буоларыгар туһуланар. Куонкуруска араас хайысхалаах үөрэх кыһаларын учууталлара кыттыахтарын сөп. Ол барыта региоҥҥа үөрэхтээһин холбоһугун ситимнииргэ туһуланара улахан суолталаах», - диэн Саха сирин баһылыга Айсен Николаев бэлиэтээн эттэ.