Хампаанньа иккис сылын тэрилтэ ыксаллаах балаһыанньаҕа түбэспит дьоҥҥо көмө буолар общественнэй бырайыактарын өйүүр. Бу бырайыак сүрүннээн Саха Өрөспүүбүлүкэтин территориятыгар үлэлиир.
Быйылгы сылга бииргэ үлэлэһии былаанын чэрчитинэн ыксаллаах быһыыга түбэспит дьоҥҥо көмө буолар сыалга диэн, баҕалаах дьону хомуйан анал үөрэтиини ыытыыны, хамаанданы тэрийиини салҕыы көҕүлээтилэр. Бу сырыыга Россиятааҕы Кыһыл Кириэс хамаандатыгар киириигэ Дьокуускай куорат олохтоохторо эрэ буолбакка Өрөспүүбүлүкэ 9 улууһуттан кыттыыны ыллылар. Биэс күн иһигэр кинилэри бастакы медицинскэй уонна псхологическэй көмөнү оҥорорго, итиэннэ быыһыыр үлэ ирдэбиллэрин кытары билиһиннэрдилэр.
Бииргэ үлэлэһии өссө биир сүрүн чааһа – Дьокуускай куоракка ыксаллаах быһыыга түргэнник ылсан үлэлэһэргэ анаан Россиятааҕы Кыһыл Кириэс суһал көмөтүн пуондатын тэрийдилэр. Онно быйылгаттан, киһи олоҕор ыксаллаах быһыы үөскээн эмсэҕэлээбит дьонугар анаан, гуманитарнай набор саппааһа баар буолла.