Хампаанньа анал саайтыгар кытай тыла киирдэ: https://rngoil.ru/cn/. Саҥа хамсааһын Кытай Норуодунай Республикатын кытта бииргэ, көдьүүстээхтик үлэлэһиигэ төһүү күүс буолуоҕа.
Кытай – хампаанньа ис экономикатын сайдыытыгар биир тутаах партнер. Кытай тылынан тахсыбыт сайт «РНГ» АУо олоххо киллэрэр бырайыактарын сырдатыыга, кэскиллээх үлэтин-хамнаһын киэҥ эйгэҕэ таһаарыыга, бииргэ үлэлэһиигэ дьоһуннаах хардыы буолар. Сайт көмөтүнэн Кытай норуотун дьоно-сэргэтэ хампаанньа Саха Өрөспүүбүлүкэтин социальнай уонна экономическэй сайдыытыгар оҥорор кылаатын, култуура, үөрэхтээһин, айылҕа харыстабылыгар оҥорор өйөбүлүн туһунан сиһилии билиһиннэриэҕэ.
Маннык көҕүлээһин дьыалабыай сибээһи бөҕөргөтүүгэ, бииргэ үлэлэһии сайдыытыгар уонна «РНГ» АУо үлэтин сырдатыыга, билиһиннэриигэ, аан дойду таһымыгар эрэллээх, эппиэтинэстээх хампаанньа буоларын бигэргэтиигэ көмө буолуоҕа.
«Хампаанньа анал саайтыгар эбии кытай тыла киирбитэ мээнэҕэ буолбатах – бу Кытай партнердарын кытта үлэҕэ уонна кинилэри өссө элбэтиигэ дьоһуннаах хардыы», – диэн хампаанньаҕа бэлиэтээтилэр.
Эрдэ «РНГ» АУо анал саайта үлэтин-хамнаһын туһунан нуучча, английскай уонна саха тылынан сырдатар этэ.
