«РНГ» АУо үлэһитэ, 71 саастаах Александр Меньшов, Коммунизм уонна Корженевской – Памир биир биллэр хайаларын өргөстөрүн Аҕа Дойду Улуу сэриитин 80 сыллаах үбүлүөйүгэр анаан дабайыаҕа уонна онно Кыайыы Знамятын тэнитиэҕэ. «РНГ» АУо экспедицияны өйөөн, бу былаан олоххо киирэригэр үбүнэн көмөлөһүөҕэ.
Памираны дабайыы олус ыарахан , үрдүк таһымнаах бэлэмнэнии наада. Альпинистартан физическэй бэлэмнэнии, хаачыстыбаннай экипировка, техника ирдэнэр. Дабайыыга бэлэмниир лааҕырга бөртөлүөт эрэ тиийэр, манна альпинистар акклиматизацияны ааһаллар.
Александр Меньшов – спорду таптааччы, олоҕун тухары сүүрүүнэн дьарыктанар, 20 сыл - дайвинг уонна парашютнай спорду өрө тутар, кини 836 төгүл парашютунан ыстаммыт. Олоҕун улахан аҥарын Саха сиригэр атаарбыт, хоту тыйыс усулуобуйатыгар хатарыллыбыт. Бүтэһик 5 сылга Александр Меньшов альпинизмы сэргэ хайыһарынан күүскэ дьарыктанар. Кини номнуо 4 дабайыыны оҥорбут. Эльбрус Арҕааҥҥы уонна Илиҥҥи, Килиманджаро уонна Ленин хайаларын өргөһүн дабайталаабыт. Билигин кини иннигэр саҥа сүүрээн турар.
«Памирскай хайалары «Крыша мира» диэн ааттыыллар. Памир хайа өргөһүн дабайыы - бу мин бэйэбин тургутан көрөр, бэйэбэр улахан ыҥырыы буолар. Улахан физическэй бэлэмнэнии, техническэй сатабыл, күүстээх санаа, дьаныардаах буолуу ирдэнэр. Мин бу дабайыыны олоххо киллэрэн Аҕа Дойду Улуу сэриитин кыайыылаахтарыгар, биһиги дьоруойдарбытыгар аныахпын баҕарабын», – диэтэ Александр Меньшов.
«РНГ» АУо төһө кыалларынан социальнай көҕүлээһиннэри, спортивнай, патриотическэй уонна культурнай тэрээһиннэри өйүүр. Александр Меньшов экспедицията – чөл, доруобай олоҕу тарҕатыы, сайыннарыы уонна Кыайыы 80 сылыгар улуу күҥҥэ ытыктааһын иэһин төлөбүрэ буолар.