2026 сылга Саха Өрөспүүбүлүкэтигэр үөрэхтээһин эйгэтин педагогическэй үлэһиттэригэр анал бириэмийэлэри аныыр үбүлүөйдээх бэһис төгүлүн ыытыллар куонкурус кыайыылаахтара ааттаннылар. Тэрээһини көҕүлээччи уонна генеральнай спонсор «РНГ» АУо буолар, сыл ахсын бастыҥ уһуйааччыларга харчынан бириэмийэ олохтуур.
Куонкурус тэрийээччилэрэ – Саха Өрөспүүбүлүкэтин үөрэхтээһиҥҥэ, наукаҕа министиэристибэтэ уонна "Саха Өрөспүүбүлүкэтин үүнэр көлүөнэтин тус сыаллаах пуондата" кэммиэрчэскэйэ суох тэрилтэ.
Быйылгы сылга хайа да сыллааҕар саамай элбэх сайаапка киирдэ – 478. Куонкуруска муниципальнай тэриллиилэр үөрэхтэрин кыһатын тэрилтэлэриттэн 367 уһуйааччы кыттыыны ылла, маны таһынан, 111 кыттааччы судаарыстыбаннай уонна чааһынай тэрилтэлэртэн. Сыл аайы куонкурус таһыма үрдээн, үөрэх тэрилтэлэрин үлэһиттэрин иһигэр киэҥник биллэр күрэх буола улаатта.
Куонкуруска кыттааччыга сүрүн ирдэбилэ диэн үөрэхтээһин эйгэтигэр үлэлээбит ыстааһа 3 сылтан кырата суох буолуохтаах, уонна үөрэх эйгэтигэр сүрүн, оскуола иннинээҕи, орто уонна анал үөрэхтэргэ ирдэнэр программаларга үлэлэспит уопута сыаналанар.
Куонкурус тутулуга суох сыаналыыр хамыыһыйата бу ирдэбиллэринэн сыаналаата: үөрэнээччилэр ситиһиилэрэ, олимпиадаларга, куонкурустарга, бырайыактарга ситиһиилээхтик кыттыылара, маны сэргэ, куонкуруска кыттар учуутал тус ситиһиитэ сыаналанна.
Күрэх түмүгүнэн Саха сирин 100 бастыҥ учуутала талылынна, кинилэргэ хас биирдиилэригэр 100 тыһыынча бириэмийэ олохтонор. Куонкуруһу түмүктүүр үөрүүлээх тэрээһин муус устар 24 күнүгэр сарсыарда 10:00 чааска Дьокуускайга 2 № -дээх Бырабыыталастыба дьиэтин аактабай саалатыгар ыытыллыаҕа.
Саха Өрөспүүбүлүкэтин үөрэҕин уонна наукатын министиэристибэтигэр бэлиэтээбиттэринэн бу ыытыллар куонкурус өрөспүүбүлүкэҕэ үөрэхтээһин эйгэтигэр каадыры сайыннарыыга, үөрэх эйгэтин үлэтигэр кылааттарын киллэрэр учууталларга харчынан өйөбүл үлэ хаачыстыбатын үрдүк таһымҥа таһаарар.
