Хампаанньа Сочи куоракка ыытыллар «Сааскы музыкальнай фестиваль» иитинэн «Symphonica ARTica» Саха сирин симфоническэй оркестырын кэнсиэрин тэрээһинигэр харчынан көмөлөстө.
Фабио Мастранджело кылаабынай дирижердаах Саха Өрөспүүбүлүкэтин государственнай филармониятын «Symphonica ARTica» симфоническэй оркестра «Сириус» наука уонна искусство паркатын кэнсиэртиир былассааккатыгар муус устар 21 күнүгэр кэнсиэртиэҕэ. Оркестры кытта тэҥҥэ Санкт-Петербург куорат арааһынай коллективтарын музыканнара кыттыыны ылыахтара. Онтон солист быһыытынан кыттыыны ылыаҕа дойду уонна аан дойду үрдүк таһымнаах куонкурустарын лауреата Анна Савкина (скрипка).
Концерды тэрийии «РНГ» АУо уонна Фабио Мастранджело салайааччылаах музыкальнай искусство сайдыытын пуондатын кытары бииргэ үлэлэһии сөбүлэҥэр олоҕуран, биир бастыҥ бырайыак быһыытынан тэриллэр. Санатан эттэххэ, ааспыт сыл бүтэһигэр хампаанньа Дьокуускай куоракка ыытыллыбыт «Мой Рахманинов» музыкальнай фестиваль тэрээһинин үбүлээбитэ. Фестиваль «Symphonica ARTica» симфоническэй оркестр кыттыылаах Владимир Онуфриев, Наталья Базалева уонна маэстро Фабио Мастранджело салайыыларынан үрдүк таһымҥа ыытыллыбыта. Бырайыагы илэ харахтарынан уонна быһа холбонуу нөҥүө 2 мөлүйүөнтэн тахса киһи көрбүтэ.