Хампаанньа уу биоресурсаларын хаҥатыы программатын салгыы үлэлэтэр. «РНГ» АУо экологтара Бүлүүтээҕи водохранилищеҕа кыһыллыҥы эттээх сыаннай балык биир сүрүн көрүҥүн, 550 тыһ. быраҥаатта балык ыаматын ыытта.
РНГ хампаанньа бөлөхтөрө хаһыс да сылын региоҥҥа уу биоресурсаларын байытыыга, чөлүгэр түһэриигэ күүскэ үлэлэһэллэр. 8 сыл иһигэр Саха сирин ууларыгар уопсайа 4,5 мөлүйүөнтэн тахса майаҕас көрүҥ балык ыытылынна.
«РНГ» АУо сакааһынан балыктары Чернышевскайдааҕы балык собуотугар лаборатория усулуобуйатыгар иитэн улаатыннараллар. Балыгы улаатыннарыыга, сөптөөх усулуобуйаны тэрийиигэ, аныгы ньымалар туһаныллаллар.
Ыамалары иитии дьиҥнээх усулуобуйаҕа майгынныыр гына оҥоһуллубут уонна хас да ый устата ыытыллар. Ыамалар улаатан, сөптөөх размеры ыллахтарына - уһунунан 2 см тэҥнэһиэхтээх, ыйааһына 40 мг улахан буоллаҕына - биирдэ ууга ыыталлар.
Экспертэр быраҥаатта балык өрүстэргэ олохсуйууларын көрдөрүүтэ улаханын бэлиэтииллэр: 2–3 ый иһигэр балыктар бэйэлэрин эйгэлэригэр номнуо үөрэнэллэр. Үс сыл иһигэр улаатан, ситэн, төрүүр-ууһуур кыахтаналлар, ол барыта балык ахсаанын элбэтэр.
«РНГ» АУо Саха сирин өрүстэригэр балык ыытыытынан сыл ахсын дьарыктанар уонна уу биоресурсаларын байытыыга, чөлүгэр түһэриигэ, регион экологическэй балаансатын тэҥнииргэ төһүү күүс буолар.
