Саха Өрөспүүбүлүкэтигэр "РНГ" АУо үбүлээһининэн быйыл 4-с төгүлүн ыытыллар үөрэхтээһин эйгэтигэр бастыҥнары быһаарар күрэх түмүгүн үөрүүлээх быһыыга таһаардылар. Хампаанньа тэрээһин кылаабынай көҕүлээччитэ уонна Генеральнай партнера. Күрэх тэрийээччилэрэ СӨ үөрэх уонна наука министиэристибэтэ, СӨ Үүнэр көлүөнэтин тус сыаллаах пуондата.
Быйылгы сылга 458 педагог кыттыыны ылбыта, бу сыыппара ааспыт сыллааҕы көрдөрүүнү кытта тэҥнээтэххэ 17 % үрдүк. Анал хамыыһыйа быһаарыытынан 100 бастыҥ педагог 100-түү тыһыынча бириэмийэни ыллылар.
СӨ бырабыыталастабатын бэрэссэдээтэлин солбуйааччы Сергей Местников бизнес эйгэтэ, судаарыстыба уонна НКО холбоһон үөрэхтээһин эйгэтэ сайдыытыгар дьоһун кылааты оҥороллор диэн "РНГ" АУо көҕүлээһинин бэлиэтээн туран эттэ. «Бу социальнай эппиэтинэс ураты уонна дьоһун холобура буолар. Хампаанньа бэйэтэ көҕүлээн, үлэлиир сирин территориятын бастыҥ учууталларын, педагогтарын бириэмийэлиир», – диэн Сергей Местников тоһоҕолоон бэлиэтээтэ.
«РНГ» АУо педагогтар куонкурустарын, үөрэхтээһин эйгэтигэр идэ таһымын үрдэтэр, учуутал, педагог, уһуйааччы сайдыытын түстүүр сыаллаах салгыы өйүүр.