Бу куонкурус Саха сиригэр Үүнэр көлүөнэ тус сыаллаах пуондатын кытары бииргэ үлэлэһии докумуонугар олоҕуран үһүс төгүлүн ыытыллар. Кыайыылаахтар 100 тыһыынча харчынан бириэмийэ ылаллар.
«РНГ» АУо - тэрээһин кылаабынай көҕүлээччитэ уонна партнера. Күрэх аан бастакытын Саха АССР төрүттэммитэ 100 сыллаах үбүлүөйүн көрсө ыытыллыбыта. Тэрээһини ол кэмтэн саҕалаан Өрөспүүлүкэ педагогическэй холбоһуктарыгар киэҥ интэриэһи ылан сыл ахсын тэрийэр туһунан быһаарыныы ылыллыбыта. Үс сыл иһигэр уопсайа 1000-тан тахса учуутал, уһуйааччы кыттыыны ылбыта уонна бу сыыппара сыл ахсын элбии турара кэрэхсэбиллээх.
Бу сырыыга өрөспүүбүлүкэ 36 оройуонуттан 390 педагог кыттыыны ылла. Кыайыылаахтары анал хамыыһыйа сыаналаата. Экспертэр үөрэнээччилэр ситиһиилэрин, учууталлар бэйэлэрин үлэлэрин уонна үөрэххэ туттуллар аныгы ньымаларын көрдүлэр. Бастыҥнары талар анал стандартары СӨ наукаҕа уонна үөрэхтээһиҥҥэ министиэристибэтэ таҥан оҥорбута.
"Мин мэлдьи этэбин, биһиги инникибит оҕолорбутугар, кинилэр Россия эрэллэрэ. Учуутал идэтин таһымын үрдэтиигэ биһиги улахан промышленнай хампаанньаларбыт эмиэ үлэлэһэллэр. Ол киһини үөрдүмүөн сатаммат. Холобур, "РНГ" АУо номнуо 3-с сылын үөрэхтээһин эйгэтигэр бастыҥ учууталлары талар куонкуруһу өйөөн генеральнай спонсор быһыытынан үлэлэһэрэ элбэҕи этэр. Хампаанньа өйөбүлүнэн 100 бастыҥ учуутал 100 тыһыынча харчынан наҕараадаланар",- диэн Саха сирин Ил Дархана Айсен Николаев бэлиэтээн эттэ.
Бу курдук региональнай былааһы кытта "РНГ" АУо региоҥҥа үөрэх сайдыытыгар кылаатын киллэрэр. Куонкуруһу таһынан хампаанньа үөрэхтээһини өйүүр элбэх бырайыакка кыттыһар, Өрөспүүбүлүкэ үөрэҕин тэрилтэлэригэр техническэй уонна консультационнай көмөнү оҥорор.