Бырайыак Россиятааҕы театральнай искусство института (ГИТИС) уонна Саха сиринээҕи культура уонна духуобунай сайдыы министиэристибэтэ бииргэ үлэлэһиилэрин түмүгэр, хампаанньа харчынан көмөтүгэр олоҕуран олоххо киирэр.
ГИТИС устудьуоннара Евгения Тикиджи-Хамбурьян уонна Василиса Кутузова Арктическэйдээҕи культура уонна искусство институтугар «Жалость» дипломнай испиктээкили туруорарга көмөлөһүөхтэрэ. Испиктээкилгэ устудьуоннар уһуйааччыларын кытары сүрүн оруоллары толоруохтара.
Туруоруу сүрэхтэниитэ сэтинньи 5-6 күннэригэр институт тыйаатырыгар буолуоҕа, саҥа туруорууну ким баҕалаах кэлэн көрүөн сөп. Инники өттүгэр бу испиктээкил тыйаатыр репертуарыгар киириэҕэ.
Маны сэргэ «РНГ» АУо көмөтүнэн Арктическэйдээҕи культура уонна искусство институтун устудьуоннара, уһуйааччылара сотору кэминэн ГИТИС бастыҥ маастардарыттан үөрэх ылар, идэ таһымын үрдэтэр сыаллаах стажировканы ааһыахтара.
Ааспыт сылга дойду бастыҥ театральнай үрдүк үөрэҕин кыһатын преподавателлэрэ Дьокуускайга кэлэ сылдьыбыттара, манна кинилэр регионнааҕы культура тэрилтэлэрин үлэһиттэригэр идэ таһымын үрдэтэр куурустары ыыппыттара. Ол курдук, уопсайа 100-тэн тахса киһи, Саха сирин тас өттүгэр айанныы соруммакка миэстэтигэр таһымы үрдэппиттэрэ.