Сыл саҕаланыыта хампаанньа коммерческэйэ суох тэрилтэҕэ оҕо дьиэтиттэн оҕону ииттэ ылыан баҕалаах дьоҥҥо анаан анал дьарыктары ыытарга диэн харчынан үбүлээһини оҥорбута.
Саҥа куурус номнуо бу өрөбүллэргэ үлэтин саҕалыыр. Кууруска кыттааччылар кэтэхтэн (онлайн) уонна миэстэтигэр тиийэн үөрэххэ кыттыһыахтарын сөп. Уопуттаах исписэлиистэр дьиэ кэргэн оҥкулун сөпкө оҥорууга, оҕону иитии сүрүн быраабылаларыгар сүбэлэри биэриэхтэрэ. Маны сэргэ, уустук, кыһалҕалаах боппуруостары хайдах быһаарарга эмиэ сиһилии тохтоон ааһыахтара. Анал кууруһу ааспыт дьон бары «Школа приемных родителей» үөрэҕи аастылар диэн туоһу сурук тутуохтара.
«РНГ» АУо Дьиэ кэргэни сайыннарар институту кытта хаһыс да сылын бииргэ үлэлэһэр. Бу курдук, хампаанньа, төрөппүт аккаастаабыт хас биирдии оҕото дьиэ кэргэҥҥэ иитиллиэхтээҕин ситиһэргэ киэҥ хабааннаах үлэни ыытар.