Россиятааҕы Кыһыл Кириэс хамсааһыны кытары бииргэ үлэлэһии чэрчитинэн хампаанньа дойду приграничнай регионугар ытыалаһыыттан эмсэҕэлээбит дьоҥҥо өйөбүл быһыытынан 2 мөлүйүөн сууммалаах харчынан көмөлөһүөҕэ.
Көрүллүбүт харчыга общественнэй тэриллии бастакы кэмҥэ туттуллар табаарынан хааччыйыыга туһаныаҕа. Ол эбэтэр таҥас-сап, ас-үөл, гигиена малын атыылаһан ыытыаҕа. Гуманитарнай көмөнү Курскай уобалас олохтоохторугар уонна да атын граница таһыгар турар уобалас олохтоохторугар ыытыахтара.
Бу иннинэ бииргэ үлэлэһии сөбүлэҥэр олоҕуран хампаанньа Саха сирин Нам улууһугар көмөлөспүтэ. Санаттан эттэххэ, бу улуус дьоно сааскы халаан уутуттан улаханнык эмсэҕэлээбиттэрэ, сорох нэһилиэктэр толору ууга былдьаммыттара. Ыксаллаах быһыыга түбэспит дьоҥҥо көмө тута тиийбитэ.