Светлинскэйдээҕи энергетикэ, ньиэп, гаас отделениетыгар «Разработка и эксплуатация нефтяных и газовых месторождений» идэҕэ үөрэнэр устудьуоннар дипломнай үлэлэрин көмүскээтилэр. Үлэлэри «РНГ» АУо ниэби учуоттуур отделыгар ниэп бэлэмнээһинин кылаабынай исписэлииһэ Айсен Васильев салайааччылаах судаарыстыбаннай экзаменационнай хамыыһыйа сыаналаата.
Устудьуоннар ньиэп уонна гаас хайысхатыгар сиртэн хостонор баайдаах сирдэртэн саҕалаан, скважиналары буурдааһыҥҥа, хомуйар пууннары ремоннааһыҥҥа уонна эксплуатациялааһыҥҥа, итиэннэ, товарнай ньиэп транспортировкатын туһунан дипломнай үлэлэрин көмүскээтилэр.
Судаарыстыбаннай экзаменационнай хамыыһыйа үлэлэри үрдүк таһымнааҕынан сыаналаата, устудьуоннар үчүгэй уонна туйгун сыаналары ыллылар. Колледжка ньиэп уонна гаас идэлэригэр саҥа набор саҕаланна. «РНГ» АУо бу үөрэх кыһатыгар уонна уопсайынан Саха Өрөспүүбүлүкэтигэр үөрэхтээһин систиэмэтэ сайдыытыгар улахан көмөнү оҥорор.