Бүтүн Россиятааҕы турнир Дьокуускай куоракка Национальнай художественнэй музей дьиэтигэр тохсунньу 22 күнүттэн олунньу 1 күнүгэр диэри ыытыллыаҕа.
Күрэхтэһиигэ уопсайа 70 спортсмен кыттыыны ылыаҕа, кинилэр истэригэр Өрөспүүбүлүкэ хас да төгүллээх чөмпүйүөннэрэ бааллар. Бастыҥнар 2024 сылга Россия Кубогын финалыгар кыттарга очко аахсыахтара.
Күрэхтэһии программатын чэрчитинэн саахымакка сөбүлээн оонньооччуларга анаан биллиилээх гроссмейстердар кыттыылаах маастар-кылаастар буолуохтара. Кыттыыны ылыахтара – Дмитрий Кряквин, Алексей Придорожнай, Дмитрий Кокарев, Баира Кованова, Галина Струтинская уонна Антон Шомоев.
«РНГ» АУо саахымакка Саха Сиригэр ыытыллар Россия Кубогын түһүмэҕин иккис сылын өйүүр. Ааспыт сылга үрдүк, дойду таһымнаах тэрээһин аан бастакытын Өрөспүүбүлүкэҕэ физкультурнай хамсааһын сайдыытын 100 сыллаах үбүлүөйүн чэрчитинэн ыытыллыбыта. Манна 5 норуоттар икки ардыларынааҕы таһымнаах гроссмейстердар кыттыыны ылбыттара. Кинилэр региоҥҥа бу көрүҥ сайдыыта үрдүк таһымнааҕын уонна саахымакка оонньооччулар бастыҥ маастарыстыбаларын бэлиэтээбиттэрэ.