Тэрээһин Фабио Мастранджело салайааччылаах музыкальнай искусствоны сайыннарыы пуондата уонна хампаанньа икки ардыгар түһэрсиллибит сөбүлэҥҥэ олоҕуран ыытылынна.
Литературнай-музыкальнай бырайыак премьерата Ю. А. Гагарин аатынан аныгы искусство уонна культура киинигэр үрдүк таһымҥа ааста. Кэнсиэр программатыгар икки сүрүн айымньы киирдэ - Сергей Прокофьев «Петя и волк» уонна Франсис Пуленк «История маленького слоненка Бабара» симфоническэй остуоруйалара. Сүдү айымньылары Symphonica ARTica Судаарыстыбаннай симфоническэй оркестр доҕуһуолунан, маэстро Фабио Мастранджело салайыытынан тыйаатыр уонна киинэ артыыһа Владимир Кошевой аахта, кини Федор Достоевскай «Преступление и наказание» романыгар олоҕурбут киинэҕэ Раскольников оруолун ситиһиилээхтик толорон киэҥ билиниини ылбыта.
«Бу бырайыакка ити айымньылар киирбиттэрэ мээнэҕэ буолбатах. Айымньылары аан дойдуга улахан да киһи, оҕо да сөбүлүүр, кылаабынай олох сыаннастарыгар доҕордоһууга, бэриниилээх буолууга уонна таптыырга үөрэтэллэр. «РНГ» АУо-ҕа биһиги тэрээһиммитин өйөөбүккүт иһин, онтон көрөөччүлэргэ итии-истиҥ сыһыаҥҥыт иһин, махталбытын биллэрэбит», – диэн музыкальнай искусство сайдыытын пуондатын президенэ маэстро Фабио Мастранджело санаатын үллэһиннэ.
Маны сэргэ, бу киэһээ, сыанаҕа киэҥ билиниини ылбыт - Пуленк «Симфониетта» уонна Прокофьев «Русская увертюра» академическэй музыкалара тыаһаан саха көрөөччүтүн сүргэтин көтөхтүлэр. Инники өттүгэр бырайыагы Москваҕа, Санкт-Петербург куоракка уонна да атын регионнарга көрдөрөр былааннаахтар.
«Спонсорскай үлэ чэрчитинэн биһиги хампаанньабыт культура уобалаһыгар баараҕай бырайыактары мэлдьи өйүүр. Биһиги Фабио Мастранджело салайааччылаах музыкальнай искусство сайдыытын пуондатын кытары 5 сылга сөбүлэҥ түһэристибит. Бииргэ үлэлэһии чэрчитинэн Саха сирин олохтоохторо өссө да элбэх интэриэһинэй, бастыҥ премьералары көрүөхтэрэ диэн бигэ эрэллээхпин», – бу курдук бэйэтин санаатын «РНГ» АУо генеральнай дириэктэрэ Владимир Ракитин үллэһиннэ.