«Бүлүү» федеральнай айан суолун А-331 учаастагар суоллары тутуу тус сыаллаах программа чэрчитинэн «РНГ» АУо хампаанньа бөлөҕө саҥа асфальт бүрүөһүнүн ууран 10 км усталаах саҥа суолу үлэҕэ киллэрдэ. Төһө да хамсык ыарыыта бүрүүкээн турдар үлэ болдьоҕор түмүктэннэ.
Саҥа бүрүөһүннээх суол учаастага Ленскэй уонна Мииринэй куораттарын икки ардыгар тутулунна. Үлэни «Бүлүү» федеральнай айан суолун салалтатын бэрэстэбиитэллэрэ, итиэннэ Мииринэйдээҕи айан суолларын салалтата тутта.
Саҥа суол бары ирдэбилгэ, суоллары тутуу үрдүк хаачыстыбатын тутуһууга толору эппиэттиир, үлэҕэ немецкэй техника уонна оборудование туттулунна. Элбэх сыллаах тутуу үлэтин уопута улахан оруоллаах буолан «РНГ» АУо бөлөҕөр тутууну чопчу ыйыллыбыт болдьоххо түмүктүүргэ улахан кыаҕы биэрдэ.
Саха сирин тыйыс усулуобуйата суоллары тутуу үлэтигэр элбэх күчүмэҕэйдэри үөскэтэр, бириэмэ бэрт кылгас. Үлэ сүрүнэ ыам ыйыттан алтынньыга эрэ диэри салҕанар. Асфальт бүрүөһүнүн хаачыстыбалаахтык уурууга, суол уһун үйэлээх буолуутун ситиһэргэ үрдүк таһымнаах исписэлиистэр үлэлииллэр. Маны сэргэ, үлэ хаачыстыбатын ситиһэргэ аныгы техника, автоматизированнай хонтуруол үлэтэ ыытыллар.
Росавтодор иһинэн киирэр «Бүлүү» федеральнай суол салайааччыта Николай Андреев түмүгү үрдүктүк сыаналаата. Бу арыллыбыт суол, тутууга ыарахан учаастак быһыытынан биллэрин, итиэннэ исписэлиистэр таһымнарын ордук чорботон бэлиэтээтэ.
Саха сирин сайдыытыгар кыттыыны ылыы, олохтоох нэһилиэнньэ олоҕун таһымын тупсарыы — «Истсиб холдинг» иһинэн киирэр «РНГ» АУо хампаанньаларын бөлөҕүн өрө тутар сүрүн сыала буолар. Бүгүҥҥү үлэ тиһигин быспакка ыытыллан, инники өттүгэр суоллары тутуу куонкурустарыгар кыттыы салҕаныаҕа.