Хампаанньа үлэтин биир сүрүн хайысхатынан үрдүк таһымнаах үлэһиттэринэн хааччыллыы, үлэҕэ, иллэҥ кэми атаарарга сөптөөх усулуобуйаны тэрийии буолар.
«РНГ» АУо – Саха Өрөспүүбүлүкэтин биир тарбахха баттанар, үлэ миэстэтин таһаарар, үлэнэн хааччыйар тэрилтэтэ буолар. Eastsib Holding хампаанньа бөлөҕөр киирэр «РНГ» АУо үлэһитин ахсаана 3 тыһыынчаҕа тэҥнэһэр. Мантан 90 % үлэһит Мииринэй оройуонугар баар. Бу оройуоҥҥа промышленнай хампаанньа сүрүн производственнэй эбийиэктэрэ үлэлииллэр. «РНГ» АУо «Олохтоох каадырдары промышленноска» республикатааҕы бырайыакка ситиһиилээхтик хаһыс да сылын кыттыыны ылар. Холобур быһыытынан эттэххэ, үлэһит уопсай ахсаана олохтоох нэһилиэнньэттэн 10% -ны ылар. Маныаха бырайыак көмөтүн бэлиэтиир тоҕоостоох.
Хампаанньаҕа улахан болҕомто үлэ усулуобуйатыгар итиэннэ иллэҥ кэми сөптөөхтүк тэрийиигэ ууруллар. Киһи олохсуйан олорор нэһилиэнньэлээх пуннарыттан тэйиччи сытар баахтабай бөһүөлэктэргэ бары аныгы ирдэбилгэ эппиэттиир усулуобуйа тэриллэн турар. Үлэһиттэргэ анаан вагон дьиэлэр уонна уопсай дьиэлэр бааллар. Уопсай дьиэҕэ биирдии хоско 2-4 киһи олорор. Вагоннарга кухня, утуйар орон, суунар сир барыта баар.
Орто Ботуобуйатааҕы ниэп, газ, газ конденсата хостонор сирин Илин блогун (ВБ СБ НГКМ) тирэх базатыгар остолобуой, спортивнай саала, аныгы спортивнай тренажердар, баанньык, таҥас сууйар, бэкээринэ үлэлииллэр. Олорор усулуобуйаны үрдүк таһымҥа тэрийэр сыаллаах анал үлэһиттэр түбүгүрэллэр.
Хампаанньа бары үлэһиттэрэ күҥҥэ үстэ аһынан хааччыллаллар. Сибиэһэй, минньигэс аһынан хааччыйарга, хампаанньа бородууксуйаны оҥорон таһаарар тэрилтэлэри кытта быһа үлэлэһэр. Ас анал технологическэй каартанан астанар. Бородууксуйа хаачыстыбата «Меркурий» федеральнай информационнай систиэмэнэн хонтуруолланар.
Биир улахан болҕомто иһэр уу хаачыстыбатыгар ууруллар. Орто Ботуобуйатааҕы ниэп, газ, газ конденсата хостонор сирин Илин блогар (ВБ СБ НГКМ) аныгы бактерициднай установкалаах, сууккаҕа 100 м3/ кыамталаах, «Атлантус» ууну ыраастыыр станция үлэлиир. Ый ахсын Роспотребнадзор Мииринэйдээҕи салаата лабораторияҕа уу хаачыстыбатын бэрэбиэркэлиир.
«РНГ» АУо үлэ хаачыстыбатын тупсарыыга араас миэрэлэри туһанар. «Хампаанньа үлэһиттэригэр социальнай пакет көрөр, ол иһигэр сыл түмүгүнэн бириэмийэ оҥоһуллар; доруобуйаны чөлүгэр түһэрэр төлөбүрдээх өҥө; үлэһиттэри страховкалааһын; араас ыарахан түгэҥҥэ түбэспит үлэһиттэргэ харчынан көмө. Маны сэргэ, баахтабай үлэһиттэр барар-кэлэр ороскуоттара толору төлөнөр», – диэн «РНГ» АУо персоналы кытары үлэҕэ дириэктэрэ Оксана Гробовец иһитиннэрдэ.
Баахтабай бөһүөлэктэри кытта чугастыы сытар нэһилиэнньэлээх пууннар балыыһаларын кытары эмиэ биир ситимнээх үлэ барар. Манна телемедицинэ өҥөтө улахан туһалаах. Эбийиэктэргэ уонна офистарга хас биирдии үлэһит доруобуйатын туругар улахан болҕомто ууруллар, бэйэни харыстанар сириэстибэлэринэн толору хааччыллан олороллор.