Хампаанньа баһаартан куттал суох буолуутун хааччыйар, гражданскай көмүскэниигэ уонна ыксаллаах быһыыга бэйэ бас билэр сулууспата айылҕа умайыыларын сэрэтэр уонна умулларар кыахтаах.
Саха Сиригэр бу сылга ойуур баһаардарыгар саамай уустук сыл үөскээн турар. Сайын саҕаланыаҕыттан 600 тыһыынчаттан тахса гектар иэннэх сир уокка былдьанна. Ол иһигэр баһаар куттала, хампаанньа кииннээн үлэлиир, Саха Сирин арҕаа өттүгэр эмиэ ааҥнаата. Ойуур баһаара тарҕаныытыгар кураан уонна тыаллаах күн-дьыл улахан сабыдыаллаах.
«РНГ» АУо ойуур баһаардарын утары охсуһууга региоҥҥа көмө оҥорор. Ол курдук уоту утары охсуһааччылар хамаандаларын аналлаах оборудованиенан, итиэннэ үлэһит илиинэн хааччыйар.
Бу курдук «РНГ» АУо Саха Сиригэр баһаартан сэрэхтээх буолуу эрэһиимэ биллэриллэн турар кэмигэр ыксаллаах быһыыны туоратарга сэрэтии үлэтин тиһигин быспакка ыытар. Хампаанньа уларсыкка ылан турар сирдэригэр, куттал үөскүөн сөптөөх ойуур учаастактарыгар, хонтуруол үлэтэ күүһүрэр. Тустаах сулууспа күүһүнэн космостан кэтээн көрүү түмүгүнэн көстүбүт термоточкалар тута үлэҕэ ылыллаллар, авиация көмөтө туһаныллар.
Бүгүҥҥү күҥҥэ ыытыллар үлэлэр, туһаныллар миэрэлэр, ниэп хостооһунун үлэтигэр, баһаартан куттал суоһаабатын, ыксаллаах быһыы-майгы үөскээбэтин мэктиэлииллэр. Маны сэргэ, нэһилиэнньэлээх пууннар, производственнэй эбийиэктэр көмүскэллээх буолалларын толору хааччыйаллар.
2021 сыл от ыйын 10 күнүгэр Мииринэй куоракка Саха Өрөспүүбүлүкэтин Ил Дархана Айсен Николаев ыксаллаах быһыыны туоратарга уонна сэрэтэргэ туһуламмыт көһө сылдьар мунньахха кыттыыны ылла. Өрөспүүбүлүкэ аҕа баһылыга бэлиэтээн эппитинэн, регион арҕаа өттүгэр аналлаах сулууспа үлэлиир буолан ойуур баһаардарын туоратыыга үлэ бириэмэтигэр ыытыллар. Бу үлэ хонтуруолга турар буолан ойуур баһаардарын куттала экономика эбийиэктэригэр, нэһилиэнньэлээх пуннарга кутталы үөскэтэ илик.