Сыл ахсын хампаанньа бүтүн Сибиир итиэннэ Саха Өрөспүүбүлүкэтин үөрэҕин кыһаларыттан устудьуоннары түмэн тутуу үлэтин тэрийэр.
Тутуу этэрээттэрин байыастара күүстээх сүүмэрдээһини ааһан анал хомуллубут биригээдэлэр састааптарыгар киирэн үлэлииллэр. Инники кэскиллээх тутааччылар, экономистар, инженердар улахан уопуттаах исписэлиистэр салалталарынан «РНГ» АУо производственнэй былассааккаларыгар, ниэп уонна гаас хостооһунун үлэлэригэр, туохха да тэҥнэммэт практическэй уопуту ылаллар.
«Устудьуоннар этэрээттэрин хамсааһына бүттүүн дойдуга саамай улахан хамсааһын быһыытынан биллэр. Бүгүҥҥү күҥҥэ диэри бу хамсааһын күүскэ тэнийэн үлэлиир. Тутуу этэрээттэрин үлэтин көмөтүнэн саҥа үөрэх ыла сылдьар устудьуоннар олох оскуолатын ааһаллар, талбыт идэлэригэр улахан туһаны ылаллар. Маны сэргэ, аҥардас бэйэлэрин кыахтарын холонон көрүүгэ эрэ буолбакка, сайыҥҥа кэмҥэ кырата суох хамнас аахсан, устудьуоҥҥа эмиэ туһалаах. «РНГ» АУо тутар этэрээттэригэр, үлэ бары өттүн учуоттаан, үрдүк таһымҥа тэриллэр. Күннээҕи үлэ түмүгүнэн эрэ буолбакка, устудьуон инники өттүгэр олоҕун бу хайысханы кытары ситимнииригэр, билиитин хаҥатарыгар туһуланар», — диэн «РНГ» АУо генеральнай дириэктэрин солбуйааччы, хампаанньа кылаабынай инженерэ Евгений Черыкаев бэлиэтээн этэр.
Тутуу этэрээттэрин байыастара, бары үлэһиттэри кытта тэҥҥэ, хампаанньа баахтабай бөһүөлэктэригэр олорон үлэлииллэр. Устудьуоннарга олорор, үлэлиир усулуобуйа эмиэ үрдүк таһымҥа тэриллэр. Ол курдук, күҥҥэ үстэ аһатар остолобуой, аныгы ирдэбилгэ эппиэттиир спортивнай саала, таҥас суунар сир, баанньык үлэлииллэр. Иллэҥ кэмҥэ устудьуоннар араас спортивнай күрэхтэргэ кыттыыны ылаллар, саахыматтыыллар, волейболга оонньууллар.
«Россия устудьуоннарын этэрээтэ» бүтүн Россиятааҕы ыччат общественнэй хамсааһынын Саха сиринээҕи салаата 10 бастыҥ иһигэр киирэр. 2021 сылга Россия регионнарын икки ардыгар 9 миэстэ, Уһук Илиҥҥэ 1 миэстэ ылары ситистэ. «РНГ» АУо өссө да инникитин бүтүн дойдутааҕы хамсааһыны өйөөн, эдэр исписэлиистэри бэлэмнээн таһаарыыга, регион үрдүк таһымнаах каадырдарынан хааччыллыытыгар улахан кылаатын киллэрсэр.