Икки өрүттээх өр кэмнээх сөбүлэҥ докумуонугар илии баттастылар.
Бииргэ үлэлэһии сөбүлэҥэ Саха сирин территориятыгар, ону тэҥэ бүттүүн дойду үрдүнэн «Якутия вдохновляет» диэн анал программа иитинэн ыытыллар культурнай хабааннаах бырайыактары өйөөһүҥҥэ олоҕурар. Маны сэргэ, араас норуоттары кытта биир ситими тутар, сайыннарар пуонда көҕүлээһиннэрэ өйөбүлү ылыахтара.
Пуонданы тэрийээччи Ханс-Йоахим Фрай бу курдук тоһо5олоон эттэ: «Россия регионнарын культурнай эйгэтигэр араас норуоттары кытта чугастыы сыһыаны олохтооһун – бу пуонда сүрүн соруга. «РНГ» АУо махталым улахан. Былааннаммыт үлэбит барыта олоххо киириэ диэн эрэнэбин».
Анал программа көмөтүнэн Саха Сирин культурнай кыаҕын өйөөһүн уонна арыйыы буолар. Маныаха айар талааннаах ыччаты иитии, кинилэр бу хайысха5а ситиһиилээхтик үлэлииллэригэр усулуобуйаны тэрийии, культура тэрилтэлэрин кытта биир ситимнээх үлэ уонна да атын араас бырайыактары көҕүлээһин киирэр. Культура уонна үөрэхтээһин салаатыгар, программа чэрчитинэн Саха сирин симфоническэй оркестырын, республика тыйаатырдарын киэҥ эйгэҕэ таһаарыыга, аан дойдуга аатыралларыгар болҕомто ууруллуо5а.
«Былааҥҥа киирбит холбоһуктаах бырайыактар талааннаах артыыстары уонна кэллэктииптэри өйөөн Саха сирин сайдыытын ситиһиэхтээх», — диэн «РНГ» АУо дириэктэрдэрин сэбиэтин, пуонда Попечительскэй Сэбиэтин чилиэнэ Геннадий Алфаренко эттэ.
Пуонданы тэрийээччи – Ханс-Йоахим Фрай – Австрияҕа, Германияҕа, Россияҕа үлэлиир культура эйгэтин менеджерэ, Сочи куорат «Сириус» үөрэхтээһин киинин уус-уран салайааччыта. «Мост искусств» пуонда Попечительскэй Сэбиэтин бэрэссэдээтэлэ Михаил Ефимович Швыдкой – норуоттар икки ардыларынаа5ы культурнай тэрээһиннэри көҕүлүүр Российскай Федерация Президенин анал бэрэстэбиитэлэ. Пуонда Президенэ – Виктор Исаакович Ямпольскай – РФ үтүөлээх артыыһа, пианист, «Трио имени Рахманинова» музыкальнай кэллэктиип салайааччыта, норуоттар икки ардыларынаа5ы фестиваллары, классическай музыка бырайыактарын тэрийээччи.