Хампаанньа «РНГ-медикам» программа олоххо киириитин салгыы ыытар.
Бырайыак чэрчитинэн 2020 сыл муус устар ыйыттан саҕалаан хампаанньа оройуоннааҕы балыыһаҕа эминэн-томунан, оборудованиенан, маны сэргэ бэйэни харыстанар сириэстибэлэри тиэрдэн улахан көмө буолар. Бу кэм устата хампаанньа орон үрдүнэн турар монитордары, сытар ыарыһахтары таһар мобильнай боксалары, харыстанар көстүүмнэри, тыҥаны ыраастыыр аппараттары, плазманы ириэрэр анал оборудованиенан көмө оҥорбута. Итиэннэ бүгүҥҥэттэн аны көһө сылдьар вакцинациялыыр пуун үлэлиэҕэ.
«РНГ» АУо генеральнай дириэктэрэ Владимир Ракитин бу курдук бэлиэтиир: «Саха сиригэр Covid-19 ыарыы тарҕаныаҕыттан ыла хампаанньа олохтоох доруобуйа харыстабылын салаатыгар күүс-көмө буолар. Саамай кылаабынайа киһи олоҕо уонна доруобуйата. Онон хампаанньа бу чааһыгар үлэһиттэрин эмиэ болҕомтоттон туора туруорбат. «РНГ» АУо Мииринэйдээҕи киин балыыһаҕа аан бастакынан көмөҕө кэлбиттэртэн биирдэстэрэ. Бу үлэ күн бүгүҥҥэ диэри салҕанар».
«РНГ хампаанньа өйөбүлүнэн оройуоннааҕы киин балыыһа бары тутаах оборудованиеларынан хааччыллан турар. Дьыл хайа да кэмигэр, ханна баҕар быһыы туруорар пууну тэрийэргэ хомуллар остуоллар, устууллар, ширмалар, рециркулятор уонна саамай кылаабынайа вакцинаны харайар, тиэйэр анал транспортировочнай холодильник бааллар. Мобильнай пуун тэрийэргэ өйөбүл буолбут РНГ хампаанньаҕа махталбыт муҥура суох. Бу маннык сүҥкэн көмө баар буолан оройуон аан дойду үрдүнэн ааҥнаабыт ыарыыны утары охсуһар», – диэн Мииринэйдээҕи киин балыыһа кылаабынай бырааһа Татьяна Стручкова бэлиэтээн эттэ.
2020 сыл түмүгүнэн «РНГ – медикам» социальнай программа «МедиаТЭК» бүтүн дойдутааҕы бириэмийэ республикатааҕы түһүмэҕэр «Социальная и экологическая инициатива» диэн номинацияҕа бастакы миэстэни ылбыта.