«РНГ» АУо ыксаллаах түгэҥҥэ түбэспит дьоннорго көмөлөһөр сыаллаах «Россиятааҕы Кыһыл Кириэс» бүтүн дойдутааҕы общественнай тэрилтэ бырайыактарын өйүөҕэ. Бииргэ үлэлэһии торумугар олохтоох нэһилиэнньэ доруобуйатын харыстабыла итиэннэ ыксаллаах быһыыга түбэспит дьону аһынан, табаарынан хааччыйыы көҕүлээһиннэрэ киириэхтэрэ. Сөбүлэҥ быһыытынан үлэ сүрүннээн Саха Өрөспүүбүлүкэтин территориятын хабыаҕа.
Бииргэ үлэлэһии чэрчитинэн ыксаллаах быһыы үөскүүр тугэнигэр, түргэнник көмө оҥоһулларын туһугар Россиятааҕы Кыһыл Кириэс суһал пуондата тэриллиэҕэ. Маны сэргэ, ыксаллаах түгэҥҥэ сыһаллык көмөҕө тиийэр анал хамаанда баар буолуоҕа. Тустаах хамаанда үлүгэр тахсыбыт сиригэр дьону быыһыырга, дьиэни-уоту чөлүгэр түһэриигэ үлэлии сылдьар судаарыстыбаннай сулууспа ноҕоруускатын аччатыа.
«Хамаандаҕа баҕа өттүнэн киирээччилэр Россиятааҕы Кыһыл Кириэс Саха сиринээҕи отделениетын баазатыгар ыксаллаах быһыыга туох, хайдах үлэлииргэ, бастакы көмөнү хайдах оҥорорго анал үөрэҕи ааһыахтара. Маннык дьаһаныы волонтердарга кылгас кэм иһигэр ыксаллаах быһыы-майгы үөскээбит сиригэр балаһыанньаны сөпкө сыаналааһыҥҥа, быһаарыыга уонна суһаллык көмөнү оҥорууга үлэ көдьүүстээх буолуутун ситиһиэҕэ», – диэн Россиятааҕы Кыһыл Кириэс бэрэссэдээтэлэ Павел Савчук иһитиннэрдэ.
Аны туран, бииргэ үлэлэһии торумугар олоҕуран, ыксаллаах быһыыга бэлэм буолан, бастакы уочарат наадалаах табаары харайар ыскылааты тэрийии боппуруоһа турар. Бу испиэһэккэ киирэллэр санитарнай-гигиеническэй набордар, утуйар таҥас, уһун болдьоххо харайыллар ас-үөл. Ыскылаат үлэтэ үөскээбит ыксаллаах быһыыны туоратарга төһүү күүс буолуохтаах.
«“РНГ” АУо куттал суох буолуутун хааччыйыы салаатыгар үлэни үрдүк таһымҥа ыытарга дьулуһар, итиэннэ, бу чааһыгар бары интэриэстээх тэрилтэлэри кытары бииргэ үлэлэһэр. Онон Россиятааҕы Кыһыл Кириэс общественнай тэрилтэни кытары үлэни саҕалааһын инникилээх уонна кэскиллээх дьыала. Саҕалааһын үтүө эрэ өрүттэрдээх», – диэн «РНГ» АУо генеральнай дириэктэрэ Владимир Ракитин санаатын үллэһиннэ.
Маны сэргэ, сотору кэминэн 2022 сылга ойуур баһаардарын утары үлэҕэ бэлэмнэнии саҕаланыаҕа. Номнуо бу үлэ болҕомтоҕо ылыллан гуманитарнай таһаҕаска, баһаарга үлэҕэ кыттыһар хамаанда чилиэннэрин анал таҥаһынан хааччыйыыга кырата суох үп көрүллүөҕэ.
Справка:
«Россиятааҕы Кыһыл Кириэс» бүтүн дойдутааҕы общественнай тэрилтэ 154 сыл анараа өттүгэр үлэтин саҕалаабыта. Сүрүн сыала – дьон кыһалҕатын аччатыы уонна ону туоратыы. РКК национальнай түмсүү уонна норуоттар икки ардыларынааҕы Кыһыл Кириэс хамсааһынын састаабыгар киирэр. Россия 83 регионугар Россиятааҕы Кыһыл Кириэс бэрэстэбиитилистибэлэрэ үлэлииллэр.