5-с төгүлүн ыытыллар «День качества — 2021» научнай-практическэй конференция Москва куоракка ыытылынна.
Быйылгы тэрээһиҥҥэ «РНГ» АУо геологияҕа уонна скважиналар сирдэрин үүттээһиҥҥэ управлениелар специалистара, дойду улахан нефтесервиснай, инжиниринговай уонна IT – хампаанньалара кыттыыны ыллылар: Halliburton, Schlumberger, Baker Hughes, NOV Inc., Emerson, ROGII, Amirig, ООО «Удмуртнефтегеофизика», «ВПТ Нефтемаш» ХЭТ уонна Илин –Сибиирдээ5и инжиниринговай хампаанньа.
«РНГ» АУо скважиналары үүттээһиҥҥэ интегрированнай бырайыактар управлениеларын салайааччыта Евгений Загуменный иһитиннэрбитинэн, төһө да ырыынакка уустуктар үөскээбиттэрин, хааччахтар баалларын иһин хаачыстыба күнүн бэлиэтиибит диэтэ. “Бу күн ыытыллыыта ниэп хайысхатыгар үлэлии сылдьааччыларга улахан суолталаах. Бүгүҥҥү тыҥаан турар кыһалҕалар, үөскээбит уустуктар уонна сыал-сорук туһунан аһаҕастык кэпсэтэр наада”, — диэтэ.
Илин Сибиир хайысхатыгар хас да сыллаах үлэ түмүгэ куһаҕана суох, дэҥҥэ көстөр инженернай толкуйдар, хас да сылы быһа мунньуллубут баай уопут Орто Ботуобуйатааҕы ниэп, газ, газовай конденсат хостонор сирин Илин блогун киэҥ далааһыннаахтык туһаҕа киллэриигэ улахан көдьүүстээхтэр.
Маныаха бэйэтин этиитигэр бу этиллибит тылларга олоҕуран хампаанньа кылаабынай геолога Павел Гречихо эмиэ бэлиэтээһиннэри оҥордо. “Ыарахан саппаастары баһылааһын саҥа көрүүлэри ирдиир. Онуоха биһиги хампаанньабыт сытыары сытар скважиналарга үлэни ыытарга саҥа ньымалары, инновационнай технологиялары туһанарга улахан болҕомтону уурар. Холобур, бүгүҥҥү күҥҥэ 3 килэмиэтир дириҥтэн саҕалаан миэтирэ аҥарыгар кытары тиийэн, сыыһата суох, чуолкайдык сири үүттүүр буоллубут. Маныаха fishbone саҥа технологияны бэлиэтиир тоҕоостоох”, — диэтэ.
Научнай-практическэй конференция кыттыылаахтара дакылааттар кэннэ, салаа бүгүҥҥү сытыы боппуруостарын тула кэпсэттилэр. Биир бастакынан улахан болҕомто Россиятааҕы нефтесервиснай ырыынак инновационнай быһаарыыларыгар уурулунна. Маны сэргэ кыттааччылар сиртэн хостонор баайдаах сирдэри чинчийиигэ уонна баһылааһыҥҥа тахсар кыһалҕалар, ол кыһалҕалары туоратыы туһунан кэпсэттилэр.
Маннык тэрээһин, биллэн турар, инники өттүгэр бииргэ үлэлэһиигэ улахан суолталаах. Ол суолта «РНГ» АУо хампаанньа эрэ туһатыгар буолбакка, Илин Сибиир ниэп, газ салаатын бүттүүн сайыннарыыга көмөлөөх буолуоҕа.