Хампаанньа хамаандата баһаарынай сулууспа Мииринэйдээҕи салаатын үлэтин анал барылыгар киирэн үлэлэһэр, баһаардарга сылдьыһар буолла.
«РНГ» АУо производственнай эбийиэктэргэ эрэ буолбакка, баһаартан сэрэхтээх буолуу боппуруостарыгар улахан болҕомтотун уурар. Маныаха хампаанньа бэйэ баһаарынай сулууспалаах буолан үлэни тэрийэргэ быдан табыгастаах. Бу курдук Мииринэй оройуонугар ыксаллаах быһыы үөскүүр түгэнигэр, ону туоратарга улахан үлэ ыытыллар. Баһаарынай сулууспа хамаандата 16 үлэһиттээх, итиэннэ үлэлээн саҕалыаҕыттан 20 умайыыны туоратарга күүс-көмө буолла.
«Биһиги ойуур баһаардарын умулларарга улахан үлэ ыытабыт. Хомойуох иһин кэнники сылларга баһаар туруута элбээтэ. «Живые алмазы Якутии» айылҕа пааркатын ойуур баһаарыттан харыстаан үлэ ыытан турабыт. Бөртөлүөтүнэн көтөн, 2 нэдиэлэ устата тыаҕа сытан элбэх сыралаах үлэни көрсүбүппүт», – диэн «РНГ» АУо ыксаллаах быһыыга, гражданскай оборонаҕа, баһаартан куттал суох буолуутун хааччыйар отдел начальнига Роман Одинцов иһитиннэрдэ.
«РНГ» АУо баһаарынай сулууспата аата эрэ “добровольнай” дэнэр. Ол эрэн хамаанда анал үөрэхтээх, улахан уопуттаах үлэһиттэртэн турар. Дойду ыксаллаах быһыыга министиэристибэтин кытта биир ситимнээхтик үлэлиир. Ленскэй, Мииринэй диспетчерскэй сулууспаларын кытары эмиэ сибээһи быспат. Хас сыл ахсын баһаартан сэрэхтээх буолуу биллэриллэн турар кэмигэр, ойуурга кэтэбил үлэтэ күүскэ ыытыллар. 2021 сылтан «РНГ» АУо баһаарынай хамаандата, баһаарынай сулууспа Мииринэйдээҕи салаатын үлэтигэр расписаниеҕа киирэн баһаардарга сылдьыһар буолла.
«РНГ» АУо баһаарынай депота бары аныгы ирдэбилгэ эппиэттиир сэбиргэлинэн, техниканан хааччыллан турар. Маны сэргэ, 2 автоцистерналаах, быыстала суох үөрэхтэр, тренировкалар ыытылла тураллар.