Хампаанньа бу курдук «РНГ – медикам» диэн үтүө санаа аахсыйатын салгыы ыытар.
Мииринэй оройуонун киин балыыһатыгар (ЦРБ) хас күн ахсын Саха Сирин арҕаа өттүгэр сытар улуустартан араас ыарыһахтар суһал да, былааннаах да эпэрээсийэлэргэ кэллэллэр. Онуоха 20 сыл анараа өттүгэр атыылаһыллыбыт эпэрээсийэлиир остуоллар эргэрэн улахан күчүмэҕэйдэр үөскүү сырыттылар. Балыыһа көрдөһүүтүн быһа гыммакка «РНГ» АУо көмөнү тута оҥордо. Уопсайа 4 хомуллар эпэрээссийэ остуолун атыылаһан быраастарга туттарда.
«Оборудование кылгас кэм иһигэр тиэрдилиннэ, уонна тута үлэлээн абырала улахан. «РНГ» АУо махталбыт муҥура суох. Хастыы эмэ сылы быһа быһаарыллыбакка турбут кыһалҕалар, дьэ быһаарыллан эрэллэр», – диэн үөрүүтүн Мииринэйдээҕи киин балыыһа кылаабынай бырааһа Татьяна Стручкова үллэһиннэ.
Ирина Доненко онколог-быраас саҥа оборудование бэрт табыгастааҕын биир бастакынан бэлиэтээтэ. Хомуллар конструкция, хайа баҕар өттүгэр эргиллэр остуол, эпэрээссийэ үрдүк таһымҥа ааһарын хааччыйыахтаах диэтэ.
Аан дойдуга, Саха Сиригэр пандемия саҕаланыаҕыттан РНГ хампаанньа улуустааҕы киин балыыһаҕа элбэх көмөнү оҥордо. Ол иһигэр, оборудованиенан хааччыйыы, эмп-том, бэйэни харыстанар сириэстибэлэр. Бу үлэ барыта «РНГ – медикам» үтүө санаа аахсыйатын нөҥүө ыытылынна. Санатан эттэххэ, бу аахсыйа «МедиаТЭК» бүтүн дойдутааҕы бириэмийэ республиканскай түһүмэҕэр бастыҥ социальнай бырайыак быһыытынан сыаналанан кыайыылаах тахсыбыта.
«РНГ» АУо кылаабынай инженерэ Евгений Черыкаев бу курдук бэлиэтиир: «Хампаанньа бу аахсыйаны тэрийэн улахан үлэни ыытта. Сыл устата Мииринэйдээҕи балыыһаҕа элбэх көмө оҥоһулунна. 2020 сыл көрдөрдө уонна бигэргэттэ – киһи доруобуйата уонна олоҕо саамай күндү буолар».