«Российский центр защиты леса» федеральнай тэрилтэ уонна хампаанньа икки ардыгар түһэрсиллибит бииргэ үлэлэһии сөбүлэҥэр олоҕуран, ойууру чөлүгэр түһэриигэ анаммыт тэрээһиннэрин саҕалаата. Ол курдук, хантараак чэрчитинэн уопсайа 643 бэс мас олордуллуоҕа.
Олордуллар мастар Амурскай уобалас питомнигыттан кэллилэр. Мастар 2 сыл анал көрүүгэ-истиигэ турдулар, уһуннара 10 см тэҥнэһэр. Бэс мас – Саха сирин киин территориятыгар, мутукчалаах көрүҥҥэ, саамай тэнийбит мас буолар. Өлүөнэ-Булуу уонна Өлүөнэ-Алдан уулаах сирдэрин сүнньүлэринэн хойуутук үүнэр, кини уһуна 40 см тэҥнэһэр, уонна Саха сирин тыйыс, тымныы усулуобуйатыгар учугэйдик, хойуутук үүнэр.
Маһы олордуу 640 га иэннэх сири хабыаҕа. Чуолаан, маннык иэннээх сири Бүлүүтээҕи лесничество быһан биэрдэ. Мас олордуу иннигэр быһыллыбыт учаастакка бэлэмнэнии үлэтэ ыытылынна – чөҥөчөктөртөн ыраастааһын, анал балаһалары оҥоруу, бөҕү-сыыһы хомуйуу, булууктааһын.
“РНГ” АУо сир ресурсаларын харыстааһыҥҥа, региоҥҥа экологическэй балаһыанньаны тупсарыыга сүҥкэн элбэх үлэни ыытар. Биһиги, төһө кыалларынан, айылҕа харыстабылын боппуруостарын өрүү өйүүбүт, экологическэй көҕүлээһиннэргэ мэлдьи көхтөөх кыттыыны ылабыт. Маны сэргэ, биһиги исписэлиистэрбит айылҕа харыстабылыгар туһуламмыт тэрээһиннэри тиһигин быспакка ыыталлар», – диэн «РНГ» АУо генеральнай дириэктэрэ Владимир Ракитин санаатын үллэһиннэ.
Бу сыл бэс ыйыгар хампаанньа исписэлиистэрэ Бүлүүтээҕи водохранилище боротуокатыгар – Аанньаах үрэххэ – 211 тыһыынчаттан тахса быраҥаатта балык ыаматын ыыппыттара. Уопсайа 2018-2022 сылларга уу биоресурсатын хаҥатыы программатын чэрчитинэн «РНГ» АУо исписэлиистэрэ 1 мөлүйүөн 556 тыһыынча балык ыаматын ыыттылар.