Перейти к основному содержанию

«РНГ» АУо саахымакка эр дьон икки ардыгар «Саха Өрөспүүбүлүкэтин баһылыгын Кубога» Россия кубогын түһүмэҕин өйөөтө

24 января 2023

Бүтүн Россиятааҕы күрэхтэһиилэр бу күннэргэ Дьокуускай куоракка, национальнай художественнай музей дьиэтигэр, ыытылла тураллар. Бу 2023 сыллааҕы 13 талыллыбыт түһүмэхтэртэн бастакылара.

Маннык улахан таһымнаах күрэх региоҥҥа, саахымат сайдыытын историятыгар, аан бастакытын ыытыллар уонна Саха Сиригэр физкультурнай хамсааһын 100 сыллаах үбүлүөйүн көрсө бастакы улахан тэрээһин буолар. Турнирга 60-тан тахса спортсмен кыттыыны ылар, кинилэр истэригэр республика хас да төгүллээх чемпионнара бааллар.

Кубок чэрчитинэн саахымат оонньуутун сөбүлээччилэргэ анаан биллиилээх гроссмейстердар Борис Грачев, Дмитрий Кряквин, Михаил Кобалий, Володар Мурзин уонна Антон Шомоев кыттыылаах маастар кылаастар буолуохтара. Онтон норуоттар икки ардыларынааҕы кылаастаах маастар Владимир Барскай тренердарга анаан маастар кылаас ыытыаҕа.

«Саха сиригэр россия кубогын түһүмэҕин тэрийии – биһиги региоммутугар улахан суолталаах. Бу көрүҥ кэнники кэмҥэ киэҥник сайдан, тэнийэн эрэр. Биһиэхэ FIDE 9 маастара бэлэмнэнэн таҕыста уонна 50-тан тахса спорт маастарыгар кандидаттар бааллар. Саахымат көрүҥэ 2024 сылга ыытыллыахтаах «Азия оҕолоро» VIII норуоттар икки ардыларынааҕы спортивнай оонньуулар программаларыгар киирэн турар. «РНГ» АУо-ҕа күрэхтэһиини өйөөбүккүтүгэр махталбытын биллэрэбит», – диэн Саха Өрөспүүбүлүкэтин саахымакка Федерациятын президенэ Владимир Егоров бэлиэтээн эттэ.

«Саахымат – өйү сайыннарар, интеллектуальнай спорт көрүҥэ. Кэнники кэмҥэ региоҥҥа киэҥ сэҥээриини ыларыттан биһиги үөрэбит эрэ. Бу ыытыллар тэрээһин сайдыы таһымын өссө үрдэтиэ, интэриэһи улаатыннарыа, кэнчээри ыччакка бу спорт көрүҥүнэн дьарыктаналларыгар төһүү күүс буолуо диэн бигэ эрэллээхпит», – бу курдук санаатын «РНГ» АУо генеральнай дириэктэрэ Владимир Ракитин үллэһиннэ.

Дьокуускайга саахымакка турнир олунньу 1 күнүгэр диэри ыытыллыа. Кыайыылаахтар уонна призердар саха чорооно моһуоннаах кубогынан уонна мэтээллэринэн наҕараадаланыахтара. Маны таһынан, рейтинговай уонна сааһынан бөлөхтөр бастыҥ кыттааччылара республика аатыттан анал бириистэри тутуохтара.

 

Теги