Перейти к основному содержанию

Мииринэйдээҕи региональнай техническай колледж устудьуоннара «РНГ» АУо производственнай эбийиэктэрин көрдүлэр

08 декабря 2022

Профориентационнай үлэ чэрчитинэн Светлинскайдааҕы энергетика, ниэп уонна газ отделениетын бастакы кууруһун устудьуоннара Орто Ботуобуйатааҕы ниэп, гаас уонна гаас конденсата хостонор баайдаах сир Илиҥҥи блогар үлэ ымпыгын-чымпыгын билсэ анал экскурсияҕа сырыттылар.

«Разработка и эксплуатация нефтяных и газовых месторождений» идэҕэ үөрэнэр устудьуоннар күн устата «РНГ» АУо хас да производственнай эбийиэктэригэр сырыттылар. Хампаанньа исписэлиистэрэ оҕолорго оҥорон таһаарыыны хааччыйар баазалар инфраструктураларын көрдөрдүлэр, кустовой былассааккаларга сырытыннардылар. Манна устудьуоннар фонтаннай арматура диэни чугастан, буурдааһын үлэтин илэ харахтарынан көрөн улаханнык сэргээтилэр. Экскурсия түмүктүүр чааһа – ниэби хомуйар киин пууҥҥа (ЦПС) буолла, манна исписэлиистэр устудьуоннарга ниэп хостооһунуттан саҕалаан, мунньуллан, транспортировкаҕа бэлэмниир үлэ хайдах ыытылларын көрдөрдүлэр.

«Маннык тэрээһиннэри үөрэх сүрүн чааһын быһыытынан сыаналыахха наада. Экскурсия көмөтө олус улахан, устудьуоннар талан ылбыт идэлэрин баһылыылларыгар туһалаах уонна үлэ ымпыгын-чымпыгын миэстэтигэр билсэр кыахтаналлар. Баҕар оҕолортон ким эмэ бу хампаанньаҕа үлэлии кэлиэ. «РНГ» АУо-ҕа олус туһалаах экскурцияны тэрийэн ыыппыттарыгар махталбытын биллэрэбит», – диэн үөрэхтээһин отделениетын сэбиэдиссэйин солбуйааччы Светлана Баиртова бэлиэтээн эттэ.

«Хампаанньа Мииринэйдээҕи технологическэй колледж үөрэхтээһиҥҥэ бырайыактарыгар өрүү көхтөөх кыттыыны ылар. Бу курдук ис хоһоонноох тэрээһиннэри өйөөммүт Саха Сиригэр ниэп уонна гаас хайысхата сайдарыгар, бу эйгэҕэ үрдүк таһымнаах исписэлиистэри бэлэмнииргэ сэмэй кылааппытын киллэрэбит», – диэн «РНГ» АУо генеральнай дириэктэрэ Владимир Ракитин санаатын үллэһиннэ.

Сыл бүтүөр диэри хампаанньа исписэлиистэрэ Светлинскайдааҕы энергетика, ниэп уонна гаас отделениетын устудьуоннарыгар анаан сиртэн хостонор баайдаах сиргэ өссө биир экскурсияны тэрийэн ыытыахтара.